Гуллар байрами арафасида Наманган ободлик ва нафосат масканига айланмоқда

Postni ulashish:

Наманган яна бир бор ўзининг бетакрор қадрияти – Халқаро гуллар фестивалини қарши олиш арафасида. Бу йил 65 бор ташкил этилиши кутилаётган ушбу йирик маданий тадбир нафақат вилоят, балки мамлакат миқёсида ҳам катта қизиқиш билан кутилмоқда. Йиллар давомида шаклланган ушбу анъана бугун Наманганни «гуллар шаҳри» сифатида қайта танитиб, унинг ўзига хос қиёфасини белгилаб бермоқда.

Фестиваль арафасида шаҳар бўйлаб олиб борилаётган кенг кўламли ободонлаштириш ва кўкаламзорлаштириш ишлари бу гал ҳам алоҳида шижоат ва масъулият билан амалга оширилмоқда. Ҳар бир кўча, хиёбон ва жамоат маскани байрамона руҳда безатилмоқда. Бу жараёнларда Наманган шаҳар ободонлаштириш бошқармаси ходимлари асосий куч сифатида майдонга чиқмоқда.

Айни пайтда бошқармада 740 нафар ходим фаолият юритиб, улар тонг саҳардан кечга қадар шаҳарни янада обод ва кўркам масканга айлантириш йўлида меҳнат қилмоқда. Уларнинг ҳар бири ўз ишига масъулият билан ёндашиб, умумий натижага муносиб ҳисса қўшмоқда. Бу эса Наманганнинг бугунги қиёфасида яққол намоён бўлмоқда.

Шаҳар марказида амалга оширилаётган ишлар айниқса эътиборга молик. Ариқ ва зовурлар тозаланиб, яроқсиз ҳолга келган қисмлари қайта таъмирланди. Бу ишлар нафақат санитария-гигиена талабларини таъминлаш, балки шаҳар инфратузилмасининг яхлит ишлашида ҳам муҳим аҳамият касб этади. Фавворалар эса тўлиқ техник кўрикдан ўтказилиб, соз ҳолатга келтирилди. Уларнинг қайта ишга туширилиши шаҳар манзарасига ўзгача жозиба бағишламоқда.

Фестивалга тайёргарликнинг энг ёрқин ифодаси, албатта, гуллар билан боғлиқ ишлар ҳисобланади. Бугунги кунда шаҳар марказидаги асосий кўчалар ва хиёбонларда ранг-баранг гуллар экиш изчил давом этмоқда. Махсус дизайнерлар томонидан ишлаб чиқилган миллий руҳдаги эскизлар асосида яратилаётган гул композициялари нафақат эстетик гўзаллик, балки маънавий мазмунни ҳам ўзида мужассам этмоқда.

Бошқармага қарашли 50 сотихлик иссиқхонада 30 дан ортиқ турдаги мавсумий гулларнинг қарийб бир миллион туп кўчатлари етиштирилаётгани мазкур йўналишдаги ишлар кўламини яққол намоён этади. Ҳар бир кўчат парваришланиб, маълум режа асосида очиқ майдонларга кўчириб, ўтқазилмоқда. Натижада шаҳар ҳудудлари босқичма-босқич гулларга бурканиб бормоқда.

Яшил ҳудудларни сақлаш ва ривожлантириш масаласи ҳам эътибордан четда эмас. Махсус техника воситалари ёрдамида гуллар ва манзарали ўсимликларга зараркунандаларга қарши ишлов берилмоқда. Бу эса уларнинг соғлом ўсиши, узоқ муддат давомида ўз жозибасини йўқотмаслигини таъминлайди. Мутахассислар бу борада замонавий агротехник усуллардан самарали фойдаланмоқда.

Наманган шаҳар ободонлаштириш бошқармаси бошлиғи Хусниддин Қозоқбоевнинг таъкидлашича фестиваль арафасида шаҳар марказининг ўзига 8 миллион гул кўчатлари экилиши режалаштирилган. Бу орқали шаҳарнинг ўзига хос қиёфасини янада бойитиш, меҳмонлар ва аҳолига байрамона кайфият улашиш кўзда тутилган.

Шаҳар тунги манзарасини янада жозибадор қилиш мақсадида ҳам қатор янгиликлар жорий этилмоқда. Замонавий ёритиш тизимлари, декоратив чироқлар, гул шаклидаги безакли конструкциялар ўрнатилиб, улар билан уйғунлаштирилган гуллар композициялари яратилмоқда. Бу эса Наманганнинг нафақат кундузги, балки тунги қиёфасига ҳам жозиба бермоқда.

Шунингдек, фестиваль кунлари учун инфратузилма ҳам пухта тайёрланмоқда. Меҳмонлар оқимини ҳисобга олган ҳолда жамоат жойлари тартибга келтирилиб, тозалик ва хавфсизлик масалаларига алоҳида эътибор қаратилмоқда. Бу эса тадбирни юқори савияда ўтказишнинг муҳим омилларидан биридир.

Таъкидлаш жоиз, Халқаро гуллар фестивали йилдан-йилга ўз кўламини кенгайтириб, хорижий меҳмонлар эътиборини тобора кўпроқ жалб этиб бормоқда. Бу эса Наманганнинг туристик салоҳиятини ошириш, унинг халқаро майдондаги нуфузини мустаҳкамлашга хизмат қилмоқда.

Бир сўз билан айтганда, Наманган бугун катта байрам арафасида яшамоқда. Ҳар бир кўча, ҳар бир хиёбон, ҳар бир гулда инсон меҳнати, диди ва меҳр-муҳаббати мужассам. Яқин кунларда эса бу саъй-ҳаракатлар ўз самарасини бериб, шаҳар яна бир бор ўзининг гўзаллиги ва нафосати билан барчани лол қолдириши шубҳасиз.

Санжарбек ҲАМИДОВ.

Javob qoldiring:

Iltimos, sharhingizni kiriting!
Iltimos, ismingizni bu yerga kiriting

Aloqador maqolalar

Сессия бўлиб ўтди

Халқ депутатлари Наманган шаҳар Кенгашининг навбатдаги XXIV сессияси бўлиб ўтди. Сессияда дастлаб шаҳар прокуратурасининг 2026-йилнинг учинчи чорагида қонунийликни мустаҳкамлаш...

Ҳаёти асраб қолинганлар дуосида яшайсиз, доктор!

Тиббиёт фанлари номзоди, Соғлиқни сақлаш аълочиси Тошпўлат Абдукаримов. У — нафақат Наманган вилояти, балки водий тиббиётидаги энг моҳир...

Баҳодир РАҲИМОВ, Наманган шаҳар тиббиёт бирлашмаси раҳбари:“ТИББИЁТДАГИ ИСЛОҲОТЛАР НАТИЖАСИ — ИНСОН САЛОМАТЛИГИДА НАМОЁН БЎЛМОҚДА”

Мамлакатимизда соғлиқни сақлаш тизимини такомиллаштириш, тиббий ёрдам сифатини ошириш, аҳолига қулай ва замонавий тиббий хизмат кўрсатиш масалаларига алоҳида...

Хўжа амин мақбараси

Наманган шаҳрининг Чорсу ҳудуди яқинида меъморий ёдгорлик –Хўжа Амин мақбараси жойлашган. Мақбара XVIII асрнинг иккинчи ярмида, Наманган Фарғона...