Mamlakatimiz Prezidentining 2024-yil 2-fevraldagi “Umumiy o‘rta ta’lim muassasalari o‘quvchilarini xorijiy til va zamonaviy kasblarga o‘qitish bo‘yicha qo‘shimcha chora-tadbirlar to‘g‘risida”gi qaroriga ko‘ra 2024-2025-o‘quv yilidan boshlab umumta’lim maktablarining 10-11-sinf o‘quvchilari xorijiy til va zamonaviy kasblarga o‘qitilmoqda. Yoshlarni kasbga yo‘naltirish va amaliy ko‘nikmalar berish maqsadida umumta’lim maktablarida samarali tizim yo‘lga qo‘yilgan.

Namangan shahridagi 88-umumta’lim maktabida mazkur loyiha doirasida 27 million so‘m mablag‘ evaziga 3 ta tikuv mashinasi va zarur xomashyo yetkazib berildi. Natijada o‘quvchilarning kasbiy ko‘nikmalari rivojlanib, dars jarayonlarida ular tomonidan tayyorlangan sifatli mahsulotlar maktab jamoasi va ota-onalar tomonidan sotib olinmoqda. Tushgan daromad esa keyingi mahsulot uchun zarur bo‘lgan xomashyoga sarflanmoqda. Bu jarayon yoshlarning kasb tanlashiga mustahkam poydevordir.
