«Ватанпарвар»  мактабидан жаҳон аренасига чиққан Муҳаммад Камалов феномени

Postni ulashish:

…Залда  сукунат. Нафаслар ҳам тин олгандай. Ёш спортчи қўлидаги пневматик қуролни тиклаб, назарини нишон марказига қадайди. Томошабинлар нафасини ушлаб, унинг ҳар бир ҳаракатини кузатади. Бу нафас бир лаҳзада ҳал бўлади: ғалаба ёки мағлубият. Ана шу сукутли лаҳзалар Муҳаммад Камалов учун оддий машқдан кўра аҳамиятлироқ: бу руҳий тайёргарлик, ирода ва аниқликнинг мадҳияси!

Наманганда, оддий спорт залларидан бошланган улуғ йўл, шу кунларда халқаро майдонларда ўзбек байроғини баланд кўтармоқда. Ўзбекистон Республикаси Мудофаасига кўмаклашувчи «Ватанпарвар» ташкилоти Наманган вилояти кенгаши тасарруфидаги Наманган шаҳар ўқув спорт техника клубининг «Ватанпарвар» тизимида биринчи отишлар, хатолар ва кечикмас машқлар орқали Муҳаммад Камалов нафақат техник маҳорат, балки ички барқарорликни ҳам ўрганди. Мураббийлари Муҳаббат Кондакова, Вадим Кондаков ва Татьяна Тарасовалар унинг иқтидорини нафақат эътироф этдилар, балки руҳини кўтариб, чиниқтирдилар, унинг иродасини мустаҳкамладилар.

2016-2021 йиллар унинг шаклланиш даври бўлди. Вилоят ва республика мусобақаларидаги совринлар туфайли унинг номи ҳанузгача маҳаллий спорт жамоатчилигида тилга олина бошлаган. Бироқ ҳақиқий синов халқаро ареналарда эди. 2019 йилда Қозоғистоннинг Чимкент шаҳридаги турнирда қўлга киритилган бронза медаль фақат медаль эмас, балки ички ишонч ва тайёргарликнинг исботи бўлди. Унинг кўзларида шу кундан кейинги ғалабаларга ишқ ва қатъият ёниб турди.

2021 йил –  Муҳаммад Камаловнинг катта спортда бурилиш йили. Россия Федерациясининг Казань шаҳридаги I-МДҲ давлатлари ўйинларида олтин медаль унинг халқаро майдондаги биринчи «омадли қадами» сифатида тарихга кирди. У нафақат ўзини, балки Наманган мактаби ва Ўзбекистон терма жамоасини ҳам эътибор марказида кўрсатди. Орадан кўп ўтмай, Чимкент шаҳридаги Осиё чемпионатида бронза медали қўлга киритилди. Бу қисқа муддатдаги икки йирик натижа барқарорлик ва ўз устида ишлаш қудратининг намоёни эди.

2022 йилда Муҳаммад Камалов жаҳон ареналарида ўз номини мустаҳкамлади. Германиянинг Зуль шаҳридаги жаҳон кубогида бронза, Озарбайжоннинг Габала шаҳридаги Гран-прида кумуш, Боку шаҳридаги жаҳон кубогида яна кумуш медалларга эга бўлди. Турли қитъалар, турли муҳит, турли рақиблар, бироқ натижа барқарор: нишон марказига интилиш. Унинг ҳар бир отиши орқали рақиблар нафақат уни, балки ўз ички чегараларини ҳам кўриб, ривожланишга чақирилади.

Йил якунида Жанубий Кореянинг Тэгу шаҳридаги Осиё чемпионатида қўлга киритилган медаль унинг халқаро тажрибасини бойитди. Муҳаммад Камолов фақат иштирокчи эмас, ғолиб сифатида майдонни тарк этди. Унинг ҳар бир қадами Наманганнинг оддий залларидан бошлаб, жаҳон ареналарига етган даврининг тарихини акс эттирди.

2023 йил ҳал қилувчи бурилиш йили. Индонезиянинг пойтахти Жакарта шаҳридаги жаҳон кубогидаги ғалаба унинг номини халқаро эътирофга олиб чиқди. Перу шаҳридаги Америка очиқ кубогида МИКС туридаги 1-ўрин унинг универсал спортчи эканини намоён қилди. Шу йили халқаро даражадаги миллий тоифадаги «Спорт устаси» унвони эса меҳнат ва матонатга берилган расмий баҳо бўлди.

2024-2026 йиллар Муҳаммад Камаловнинг барқарорлиги ва эътирофи йили бўлди. МДҲ ўйинлари ва Нью-Дели шаҳридаги Осиё чемпионатидаги олтин ва кумуш медаллар унинг халқаро майдондаги нуфузини янада мустаҳкамлади. У нафақат рақобатчи, балки ирода ва интизом рамзига айланди.

Аммо ҳақиқий ғалаба медалларда эмас. Унинг куч-қудрати  босим остида ўзини йўқотмасликда, сукутда ғалаба қозонишда, ҳар бир отишда иродасини кўрсатишда. Пневматик қуролдан ўқ отишда рақиб сен билан эмас, сенинг асабинг билан курашади. Муҳаммад Камалов эса ҳар бир синовда ўзини енгиб, нишон марказига етади.

Бугун у Ўзбекистон терма жамоасининг ишончли аъзоси сифатида халқаро ареналарда мамлакат шарафини ҳимоя қилмоқда. Унинг ҳар бир ҳаракати – байроқ учун! Ҳар бир ғалабаси – миллат ифтихори! Намангандан жаҳон ареналаригача узоқ йўл босган Муҳаммад Камалов исми ёш спортчилар қалбида ирода ва интизом рамзига айланди.

Нишон маркази – бу шунчаки доира эмас. У ирода, интизом ва орзу нуқтаси. Муҳаммад Камалов шу нуқтага етди. Сукунатда курашди. Сукунатда ғалаба қозонди. Ва шу сукутда бутун бир миллатнинг ишончи мужассам!

Санжарбек ҲАМИДОВ.

Javob qoldiring:

Iltimos, sharhingizni kiriting!
Iltimos, ismingizni bu yerga kiriting

Aloqador maqolalar

Сессия бўлиб ўтди

Халқ депутатлари Наманган шаҳар Кенгашининг навбатдаги XXIV сессияси бўлиб ўтди. Сессияда дастлаб шаҳар прокуратурасининг 2026-йилнинг учинчи чорагида қонунийликни мустаҳкамлаш...

Ҳаёти асраб қолинганлар дуосида яшайсиз, доктор!

Тиббиёт фанлари номзоди, Соғлиқни сақлаш аълочиси Тошпўлат Абдукаримов. У — нафақат Наманган вилояти, балки водий тиббиётидаги энг моҳир...

Баҳодир РАҲИМОВ, Наманган шаҳар тиббиёт бирлашмаси раҳбари:“ТИББИЁТДАГИ ИСЛОҲОТЛАР НАТИЖАСИ — ИНСОН САЛОМАТЛИГИДА НАМОЁН БЎЛМОҚДА”

Мамлакатимизда соғлиқни сақлаш тизимини такомиллаштириш, тиббий ёрдам сифатини ошириш, аҳолига қулай ва замонавий тиббий хизмат кўрсатиш масалаларига алоҳида...

Хўжа амин мақбараси

Наманган шаҳрининг Чорсу ҳудуди яқинида меъморий ёдгорлик –Хўжа Амин мақбараси жойлашган. Мақбара XVIII асрнинг иккинчи ярмида, Наманган Фарғона...