Наманган вилоятида транспорт инфратузилмасини ривожлантириш доирасида янги йўналишда авиақатнов йўлга қўйилди. Жорий йил 3 апрелдан бошлаб “Uzbekistan Airways” авиакомпанияси томонидан Наманган–Деҳли–Наманган йўналишида мунтазам парвозлар амалга оширилмоқда.
Ҳозирча рейслар ҳафтасига бир марта — жума куни йўлга қўйилди. Келгусида эса йўловчилар талаби асосида парвозлар сонини ҳафтасига 2–3 мартагача ошириш режалаштирилган.
Мазкур йўналишнинг очилишига қадар Деҳлига тўғридан-тўғри авиақатновлар фақат Тошкент халқаро аэропорти орқали амалга оширилар эди. Янги рейс эса Наманган вилояти ва Фарғона водийси аҳолиси учун вақт ва масофани қисқартириб, қўшимча қулайлик яратади.
Парвозлар замонавий «Airbus A320» русумли самолётларда амалга оширилади.
