25 октябрь — Ўзбекистон Республикаси Ички ишлар органлари ходимлари куни муносабати билан хизмат бурчини бажариш чоғида ҳалок бўлган ички ишлар органлари ходимларининг оила аъзолари ҳолидан хабар олинди.
Наманган шаҳар ҳокими Аюбхон Камалов, шаҳар Ички ишлар бошқармаси бошлиғи Илҳомжон Сотиволдиев ҳамда шаҳар прокурори Қодирхон Асқаров бошчилигидаги масъуллар марҳум ходимларнинг хонадонларида бўлиб, уларнинг оила аъзолари билан суҳбатлашдилар. Уларнинг порлоқ хотирасига ҳурмат бажо келтирилиб, вилоят Ички ишлар бошқармаси бошлиғи Шуҳрат Алиевнинг байрам муносабати билан йўллаган табриги ўқиб эшиттирилди.
Суҳбат давомида марҳум ходимларнинг Ватан тинчлиги, халқ осойишталиги ва фуқаролар хавфсизлигини таъминлаш йўлида олиб борган фидокорона хизматлари, зиммасидаги шарафли бурчни сидқидилдан адо этгани алоҳида таъкидланди.
Эл-юрт тинчлиги йўлида жон фидо қилган мард ва жасур ходимларнинг хотираси ҳамиша қалбларда яшаши, уларнинг оилаларини эъзозлаш, яқинларига ҳурмат ва эътибор кўрсатиш муҳим қадрият экани қайд этилди.
