Ёшлар куни доирасида Наманган шаҳар ҳокими Аюбхон Камалов 41-сонли умумий ўрта таълим мактабида бўлиб, бу ерда ўқувчилар учун яратилган шароитлар ҳамда таълим-тарбия жараёни билан танишди. Битирувчи ёшлар билан ўтказилган мулоқотда уларнинг келгуси режалари, таълим ва касб танлаши билан боғлиқ масалалар муҳокама қилинди.
Ҳозирда мактабда 1 минг 286 нафар ўқувчи таҳсил олиб, уларга 75 нафар педагог сабоқ бермоқда. Жорий ўқув йили якунига қадар 70 нафар ўқувчининг мактабни тамомлаши кутилмоқда.
Мактаб битирувчиларининг келгуси таълим ва меҳнат фаолиятига тайёргарлигига ҳам эътибор қаратилмоқда. Хусусан, ўтган йили 78 нафар битирувчидан 12 нафари олий таълим муассасаларига ўқишга қабул қилинган. Қолган битирувчиларнинг бандлиги таъминланган.
Таълим муассасасида ўқувчиларнинг спортга бўлган қизиқишини қўллаб-қувватлаш борасида ҳам муайян ишлар амалга оширилмоқда. Волейбол ва мини-футбол бўйича қизлар жамоалари вилоят миқёсидаги мусобақаларда иштирок этиб, муносиб натижаларни қайд этмоқда.
Учрашувда битирувчилар ўзларини қизиқтирган саволлар билан шаҳар ҳокимига мурожаат қилди. Ёшлар таълимни давом эттириш, касб-ҳунар эгаллаш ва бандлик имкониятлари юзасидан ўз фикрларини билдирди.
Мулоқот очиқ ва самимий руҳда ўтиб, ёшларнинг таклиф ва ташаббуслари тингланди.
