Навоий орзуларининг рўёби

Postni ulashish:

Сўз салтанатининг соҳибқирони, ҳазрат Алишер Навоий “Сабъаи сайёр” достони якунида улуғвор орзу-истаклар оғушида ўз асарларининг умрбоқий бўлишини, етти иқлимга машҳур бўлишини Аллоҳдан сўрайди:

Етти афлокни анга ёр эт,

Етти иқлим элин харидор эт.

Не тонгки, ўша улуғвор орзу-истаклар бугун ўз тантанасини нишонламоқда. Яъни буюк шоир асарлари нафақат мамлакатимизда, балки бутун дунё бўйлаб қўлма-қўл ўқилмоқда.

Наманган шаҳридаги 51-умумтаълим мактабида ҳам “Феврал — буюк алломалар ойлиги” доирасида “Алишер Навоий — миллат фахри, адабиёт қуёши” мавзусида маърифий-музикали тадбир бўлиб ўтди. Тадбирда Ўзбекистон Ёзувчилар уюшмаси аъзолари — Муҳаммад Вали, Иброҳим Маҳкам, Гулчеҳра Муродова иштирок этиб, Алишер Навоий ҳаёти ва ижодининг ўқувчилар эътибор қаратиши зарур бўлган муҳим жиҳатлари хусусида сўз юритдилар.

Тажрибали муаллима, олий тоифали ўқитувчи Мунаввар Маматвалиева бошчилигида 3-“А” ва 11-“А” синф ўқувчилари томонидан тайёрланган бадиий-музикали композиция меҳмонлар ҳамда ота-оналар томонидан қизғин олқишлар билан қарши олинди. Хусусан, 3-“А” синф ўқувчилари томонидан ижро этилган “Нон иси” номли саҳна кўриниши йиғилганларда завқ-шавқ ва катта таассурот уйғотди. Айниқса, Алишер Навоий ва Ҳусайн Бойқаро образларини ижро этган болажонларнинг равон нутқи, актёрлик маҳоратига хос оҳанг, шунингдек, ўша давр руҳини акс эттирувчи либослар йиғилганларни беихтиёр ҳаяжонга солди.

Тадбир якунида сўзга чиққан мактаб директори Роҳила Мирзаева мазкур билим маскани ўқитувчи ва ўқувчилари мисолида Навоий орзулари амалда ўз ифодасини топаётганини таъкидлаб, барча иштирокчиларга миннатдорчилик билдирди.

Мунаввар Маматвалиева
Наманган шаҳридаги 51-мактаб ўқитувчиси

Javob qoldiring:

Iltimos, sharhingizni kiriting!
Iltimos, ismingizni bu yerga kiriting

Aloqador maqolalar

Сессия бўлиб ўтди

Халқ депутатлари Наманган шаҳар Кенгашининг навбатдаги XXIV сессияси бўлиб ўтди. Сессияда дастлаб шаҳар прокуратурасининг 2026-йилнинг учинчи чорагида қонунийликни мустаҳкамлаш...

Ҳаёти асраб қолинганлар дуосида яшайсиз, доктор!

Тиббиёт фанлари номзоди, Соғлиқни сақлаш аълочиси Тошпўлат Абдукаримов. У — нафақат Наманган вилояти, балки водий тиббиётидаги энг моҳир...

Баҳодир РАҲИМОВ, Наманган шаҳар тиббиёт бирлашмаси раҳбари:“ТИББИЁТДАГИ ИСЛОҲОТЛАР НАТИЖАСИ — ИНСОН САЛОМАТЛИГИДА НАМОЁН БЎЛМОҚДА”

Мамлакатимизда соғлиқни сақлаш тизимини такомиллаштириш, тиббий ёрдам сифатини ошириш, аҳолига қулай ва замонавий тиббий хизмат кўрсатиш масалаларига алоҳида...

Хўжа амин мақбараси

Наманган шаҳрининг Чорсу ҳудуди яқинида меъморий ёдгорлик –Хўжа Амин мақбараси жойлашган. Мақбара XVIII асрнинг иккинчи ярмида, Наманган Фарғона...