Наманган шаҳридаги 14 оилавий поликлиника томонидан аҳоли саломатлигини мустаҳкамлаш борасида яна бир амалий қадам ташланди. Муассаса қамровидаги 6 та маҳалла, 4 та умумтаълим мактаби ва 2 та боғча ҳудудида истиқомат қилувчи 33 минг 500 нафардан ортиқ аҳоли профилактика ишлари билан мунтазам қамраб олинмоқда.
Бу йўналишда тиббиёт ходимлари 69 та мактабгача таълим ташкилотида «Тоза қўллар» соғлом турмуш ташаббусини амалга оширди. Тадбир давомида болаларга шахсий гигиена меъёрлари, қўл ювишнинг юқумли касалликлардан ҳимоясидаги ўрни бўйича маълумотлар берилди. Энг муҳими, кичкинтойлар амалий машғулотлар орқали тўғри қўл ювиш қоидаларини ўргандилар ўзлари бажардилар.
Мутахассисларнинг таъкидлашича, гигиена маданиятини ёшлик чоғларидан шакллантириш болалар саломатлиги, касалликларнинг олдини олиш, шунингдек, оилавий фаровонликда энг самарали воситалардан бири ҳисобланади.
Поликлиникада бундай тадбирлар давомий бўлиб, соғлом авлод тарбиясига қаратилган профилактика ишлари изчил давом эттирилади.
Улуғбек СОБИТОВ.
